ທ່ານ ນາງ ສຸດາພອນ ຄົມທະວົງ, ຫົວໜ້າພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວແຂວງຫລວງພະບາງ ໃຫ້ຮູ້ໃນໂອກາດລາຍງານກອງປະຊຸມປຶກ ສາຫາລື ເພື່ອກຽມຄວາມພ້ອມຕ້ອນຮັບນັກທ່ອງທ່ຽວໃນລະດູການທ່ອງທ່ຽວຂອງແຂວງຫລວງພະບາງ ຈັດຂຶ້ນເມື່ອບໍ່ດົນມານີ້ ວ່າ:
ໃນປີ 2025 ຈະສູ້ຊົນດຶງດູດນັກທ່ອງທ່ຽວໃຫ້ໄດ້ທັງໝົດ 2,306,375 ເທື່ອຄົນ, ໃນນີ້, ນັກທ່ອງທ່ຽວພາຍໃນ 522,270 ເທື່ອຄົນ ແລະ ນັກທ່ອງທ່ຽວສາກົນ 1,784,105 ເທື່ອຄົນ, ສາມາດສ້າງລາຍໄດ້ຈາກການໃຊ້ຈ່າຍຂອງນັກທ່ອງທ່ຽວທັງ ໝົດ 1,276,447,055 ໂດລາສະຫະລັດ. ຄຽງຄູ່ກັນນີ້, ຕ້ອງໄດ້ສືບຕໍ່ປັບປຸງ ແລະ ພັດທະນາໂຄງລ່າງພື້ນຖານ ແລະ ສິ່ງອໍານວຍຄວາມສະດວກດ້ານການທ່ອງທ່ຽວ ໃນສະຖານທີ່ທ່ອງທ່ຽວທີ່ສໍາຄັນຂອງແຂວງ ໃຫ້ໄດ້ມາດຕະຖານສະຖານທີ່ທ່ອງທ່ຽວແຫ່ງຊາດ ແລະ ຫັນເຂົ້າສູ່ລະບົບທີ່ທັນສະໄໝເທື່ອລະກ້າວ ເປັນຕົ້ນແມ່ນ: ສະຖານທີ່ທ່ອງທ່ຽວນໍ້າຕົກຕົກຕາດກວາງຊີ, ວັດຊຽງທອງ, ພູສີ, ຫໍພິພິທະພັນແຫ່ງຊາດຫຼວງພະບາງ ແລະ ຖ້ຳຕິ່ງ.
ສໍາລັບປີ 2024 ຜ່ານມາ, ແຂວງຫລວງພະບາງ ສາມາດດຶງ ດູດນັກທ່ອງທ່ຽວຕ່າງປະເທດໄດ້ທັງໝົດ 1,532,393 ຄົນ, ໃນນີ້ ຫລາຍກວ່າໝູ່ແມ່ນນັກທ່ອງທ່ຽວຈີນ ຈໍານວນ 438,355 ຄົນ, ຮອງລົງມາແມ່ນນັກທ່ອງທ່ຽວໄທ ຈໍານວນ 175,575 ຄົນ.
ທີ່ມາ: ວສລ
