ພິພິທະພັນສິລະປະລາວ ຕັ້ງຢູ່ບ້ານໂນນສະອາດ (ເຂດໜອງເຊືອມ) ເມືອງໄຊທານີ, ນະຄອນຫຼວງວຽງຈັນ ເປີດຢ່າງເປັນທາງການ ໃນວັນທີ 05/01/2025, ແລະຈະກາຍເປັນໃບໜ້າໃໝ່ໃນການທ່ອງທ່ຽວທີ່ສໍາຄັນ ອີກແຫ່ງໜຶ່ງຂອງນະຄອນຫຼວງວຽງຈັນ.
ນັກທຸລະກິດລາວໃຊ້ງົບປະມານ 50 ລ້ານໂດລາສະຫະລັດ ເນລະມິດພື້ນທີ່ໃກ້ແຄມອ່າງເກັບນໍ້າ ຊົນລະປະທານໜອງເຊືອມ ເພື່ອສ້າງເປັນຫໍພິພິທະພັນວຽງຈັນ ສິລະປະລາວຮ່ວມສະໄໝ ເຊິ່ງຄາດວ່າ ສະຖານທີ່ດັ່ງກ່າວຈະກາຍແຫ່ຼງທ່ອງທ່ຽວທີ່ໜ້າສົນໃຈທີ່ສຸດເນື່ອງວ່າເພີ່ນຈະນໍາເອົາຜະລິດຕະພັນໄມ້ຫາຍາກ, ພາບສິລະປະ ແລະ ວັດຖຸບູຮານເກົ່າແກ່ອື່ນໆຈໍານວນ 10,000 ລາຍການມາໂຮມໄວ້ນີ້.
ທ່ານ ພິຊິດ ໄຊຍະທິດ ເຈົ້າຂອງພິພິທະພັນ ໄດ້ໃຫ້ຂໍ້ມູນວ່າ: ການກໍ່ສ້າງພິພິຕະພັນສິລະປະລາວ ເລີ່ມຕົ້ນມາແຕ່ປີ 2021 ໂດຍນໍາໃຊ້ງົບປະມານ 50 ລ້ານກວ່າໂດລາສະຫະລັດ, ມີເນື້ອທີ່ 80 ເຮັກຕາ ເພື່ອສ້າງໃຫ້ເປັນແຫຼ່ງທ່ອງທ່ຽວທາງສິລະປະວັດທະນະທຳ ຕິດພັນກັບທຳມະຊາດຢ່າງຄົບວົງຈອນ ປະກອບມີ:
– ອາຄານນໍາສະເໜີຂໍ້ມູນກ່ຽວກັບຫໍພິພິທະພັນ,
– ອາຄານຕ້ອນຮັບອາຄານວາງສະແດງງານສິລະປະ-ວັດທະນະທໍາຕາມເທສະການຕ່າງໆ,
– ຫ້ອງໂຖງພັກຜ່ອນຊົມທິວທັດ,
– ອາຄານອະເນກປະສົງ,
– ອາຄານສະແດງງານສິລະປະໄມ້ແກະສະຫຼັກ ແລະ ຮູບແຕ້ມ,
– ຮ້ານ ຂາຍເຄື່ອງທີ່ລະນຶກ,
– ໂຮງແຮມ, ຣີສອດ, ອາຄານວາງສະແດງສິນຄ້າ, ຮ້ານອາຫານ, ເຄື່ອງດື່ມ, ນໍ້າຕົກຈໍາລອງ ແລະ ອື່ນໆ.
ນອກຈາກນີ້, ຫໍພິພິທະພັນສິລະປະລາວ ຈະກາຍເປັນສູນກາງການຮຽນຮູ້, ການແລກປ່ຽນຄວາມຄິດສ້າງສັນ ແລະ ການພັດທະນາສິນລະປະ ທີ່ສອດຄ່ອງກັບຄວາມຮ່ວມມືລະຫວ່າງ ສິນລະປິນຈາກທົ່ວໂລກ. ເຊິ່ງຈະມີທັງການຈັດນິເທດສະການ, ການຝຶກອົບຮົມ ແລະ ກິດຈະກຳຕ່າງໆ ເພື່ອສົ່ງເສີມໃຫ້ເຍົາວະຊົນ ແລະ ສິນລະປິນລຸ້ນຕໍ່ໄປ ໄດ້ສືບສານວຽກງານແກະສະຫຼັກໄມ້, ວິຈິດສິນ ແລະ ຈິດຕະກຳຕະຫຼອດເຖິງການສ້າງສັນສິ່ງໃໝ່ໆ ທີ່ເປັນເອກະລັກຂອງປະຊາຊົນລາວຕໍ່ໄປ.
ພິພິທະພັນສິລະປະລາວແຫ່ງນີ້, ຈະບໍ່ເປັນພຽງສະຖານທີ່ສະແດງຜົນງານສິນລະປະເທົ່ານັ້ນ ແຕ່ຈະເປັນເວທີທີ່ເປີດຮັບສິນລະປິນຈາກທົ່ວທຸກມູມໂລກ ໄດ້ແລກປ່ຽນ ແລະ ຮ່ວມມືກັບສິນລະປິນລາວ ເພື່ອສ້າງສັນຜົນງານຮ່ວມກັນ.
