ໃນວັນທີ 24 ທັນວາ 2019 ທີ່ມະຫາວິທະຍາໄລແຫ່ງຊາດລາວ, ສະຖານທູດ ສປ ຈີນ ປະຈໍາ ສປປ ລາວ ຕາງໜ້າໃຫ້ລັດຖະບານ ສປ ຈີນ ມອບທຶນການສຶກສາ ໃຫ້ນັກສຶກສາມະຫາ ວິທະຍາໄລແຫ່ງຊາດລາວ ຈຳນວນ 60 ທຶນ, ຕາງໜ້າມອບໂດຍ ທ່ານ ຈ່ຽງຈ້າຍຕຸ່ງ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ ແລະ ກ່າວຮັບໂດຍ, ທ່ານ ສົມສີ ຍໍພັນໄຊ ອະທິການບໍດີ ມະຫາວິທະຍາໄລແຫ່ງຊາດ. ໂອກາດດັ່ງກ່າວ, ທ່ານ ສົມສີຍໍພັນໄຊ ໄດ້ກ່າວສະແດງຄວາມຂອບໃຈຢ່າງສູງ ຕໍ່ລັດຖະ ບານ ສປ ຈີນ,ເຊິ່ງທຶນການສຶກສາດັ່ງກ່າວ ເປັນໂອກາດທີ່ດີ ແລະ ມີຄວາມສຳຄັນຍິ່ງ ທັງເປັນກໍາລັງໃຈ ໃຫ້ກັບນັກສຶກສາ. ນອກນີ້, ຍັງເປັນການປະກອບສ່ວນສໍາຄັນ ເຂົ້າໃນການສ້າງຊັບພະຍາກອນມະນຸດ ກໍຄື ການພັດທະນາເສດຖະກິດ-ສັງຄົມ ຂອງລາວ ຕື່ມອີກ.
ທ່ານ ຈ່ຽງຈ້າຍຕຸ່ງ ໄດ້ກ່າວວ່າ: ທຶນການສຶກສາ ເອກອັກຄະລັດຖະທູດ ສປ ຈີນ ເລີ່ມມີຂຶ້ນເມື່ອປີ 2014 ໂດຍມີຈຸດປະສົງ ເພື່ອຊ່ວຍເຫລືອນັກສຶກສາທີ່ມີຄຸນສົມບັດດີ ແລະ ຮຽນດີ, ແຕ່ຄອບ ຄົວທຸກຍາກ. ຜ່ານມາມີນັກສຶກສາລາວ ທີ່ໄດ້ຮັບທຶນການສຶກສາ ຈາກສະຖານທູດຈີນ ປະຈໍາ ລາວ ແລ້ວ 207 ທຶນ. ປັດຈຸບັນ, ລາວເປັນປະເທດອັນດັບ #1 ໃນບັນດາປະເທດອາຊຽນ ທີ່ໄດ້ຮັບທຶນການສຶກສາ ຈາກລັດຖະບານຈີນ, ຂະນະທີ່ນັກສຶກສາລາວ ທີ່ກໍາລັງສຶກສາຢູ່ ສປ ຈີນ ກໍຢູ່ໃນລະດັບແຖວໜ້າໃນບັນດາປະເທດອາຊຽນ ອີກດ້ວຍ. ທ່ານ ຈ່ຽງຈ້າຍຕຸ່ງ ກ່າວຕື່ມວ່າ: ພັກ ແລະ ລັດຖະບານຂອງສອງປະເທດ ຈີນ-ລາວ ລ້ວນແຕ່ໃຫ້ຄວາມສຳຄັນຕໍ່ການສຶກສາ. ສະຖານທູດຈີນ ປະຈໍາ ລາວ ຍິນດີ ທີ່ຈະສືບຕໍ່ໃຫ້ການຊ່ວຍເຫລືອ ກໍ່ຄືສ້າງໂອກາດ ໃຫ້ກັບນັກສຶກສາລາວໃນການຮ່ຳຮຽນ. ຫວັງວ່ານັກສຶກສາທີ່ໄດ້ຮັບທຶນ ການສຶກສາ ຈະເປັນຜູ້ສືບທອດພະລາກິດ ສັງຄົມນິຍົມ ຂອງລາວ ກໍ່ຄື ເປັນຜູ້ສ້າງມິດຕະພາບ ຈີນ-ລາວ, ຈະຕັ້ງໃຈຮ່ຳຮຽນ ເພື່ອປະກອບສ່ວນເຂົ້າໃນການ ສ້າງສາພັດທະນາປະເທດຊາດ ກໍຄື ການສ້າງຄູ່ຮ່ວມຊາຕາກໍາ ຈີນ-ລາວ ຕື່ມອີກ.
