ກອງປະຊຸມລັດຖະບານເປີດກວ້າງ ຄັ້ງທີ 2 ປີ 2019 ໄດ້ຈັດຂຶ້ນໃນວັນທີ 19 ທັນວານີ້ ທີ່ຫໍປະຊຸມແຫ່ງຊາດ ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະ ມົນຕີ, ມີບັນດາທ່ານຮອງນາຍົກ ລັດຖະມົນຕີ, ສະມາຊິກລັດຖະ ບານ, ບັນດາເຈົ້າແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານນາຍົກລັດຖະມົນຕີ ກ່າວວ່າ: ກອງປະຊຸມຄັ້ງນີ້ ຈະໄດ້ປຶກສາຫາລືວຽກງານທີ່ສໍາຄັນຂອງຊາດ ຕິດພັນກັບການປະຕິບັດພາລະບົດບາດ ແລະ ໜ້າທີ່ຂອງລັດຖະບານ, ຂະແໜງການ ແລະ ອົງການປົກ ຄອງທ້ອງຖິ່ນ ຊຶ່ງກອງປະຊຸມຈະໄດ້ຄົ້ນຄວ້າ ແລະ ປຶກສາຫາລື 6 ບັນຫາສຳຄັນ ຄື:
1. ເຜີຍແຜ່ການຈັດຕັ້ງປະ ຕິບັດ ມະຕິຂອງກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII ແລະ ດຳລັດຂອງນາຍົກລັດ ຖະມົນຕີ ວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ແລະ ແຜນງົບປະມານແຫ່ງລັດ ປະຈໍາປີ 2020;
2. ການສົ່ງເສີມການຜະ ລິດເປັນສິນຄ້າ, ການຄໍ້າປະກັນສະບຽງອາຫານ, ການຊົມໃຊ້ຜະລິດຕະພັນທີ່ຜະລິດພາຍໃນ ແລະ ການຄຸ້ມຄອງການນໍາເຂົ້າສິນຄ້າອຸປະໂພກ-ບໍລິໂພກ;
3.ລາຍງານສະພາບການແກ້ໄຂໄພພິບັດ ທາງທໍາມະຊາດ ໃນຂອບເຂດທົ່ວປະເທດ ປີ 2019 ແລະ ມາດຕະການຮັບມືໃນຕໍ່ໜ້າ;
4. ສະຫຼຸບລາຍງານ ຜົນການກວດກາບັນດາໂຄງການ ເຊົ່າສຳປະທານທີ່ດິນ;
5. ລາຍງານຄວາມຄືບໜ້າ ການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ຂະໜາດກາງ;
6. ຮ່າງຂໍ້ຕົກລົງ ຂອງນາ ຍົກລັດຖະມົນຕີ ວ່າດ້ວຍການປັບປຸງການບໍລິການ ລົງທຶນປະຕູດຽວ;
ເພື່ອເຮັດໃຫ້ກອງປະຊຸມຂອງພວກເຮົາ ດໍາເນີນໄປຢ່າງມີປະສິດທິຜົນສູງ ສະເໜີໃຫ້ພາກສ່ວນກ່ຽວຂ້ອງລາຍງານຢ່າງກະທັດຮັດ, ຊັດເຈນ ແລະ ລົງເລິກບັນຫາສໍາຄັນທີ່ຢາກໃຫ້ກອງປະຊຸມຄົ້ນຄວ້າ ແລະ ພິຈາລະນາ. ສ່ວນການປະກອບຄໍາເຫັນ ກໍໃຫ້ເວົ້າກະທັດຮັດ, ເນັ້ນໃສ່ຄໍາເຫັນທີ່ແຕກຕ່າງ, ອະທິບາຍເຫດຜົນ ແລະ ສະເໜີຄໍາເຫັນ ຫຼື ທາງອອກເພື່ອໃຫ້ສາມາດສະຫຼຸບເປັນມະຕິຂອງກອງປະຊຸມໄດ້.
(ຂ່າວ: ແສງຈັນ)
ປະຊາຊົນ
