ທັບນັກກິລາບານເຕະທີມຊາດລາວເຍົາວະຊົນຮຸ່ນອາຍຸບໍ່ເກີນ 16 ປີ ຖືກຈັບຢູ່ກຸ່ມ ຈີ ຮ່ວມກັບທີມຊາດມາເລເຊຍ,ຟີລິບປິນ, ນອດເທີນ ມາເຣຍນາ ແລະ ທີມຊາດຕີມໍ ເລສເຕ ໃນການແຂ່ງຂັນເຕະບານຮຸ່ນອາຍຸບໍ່ເກີນ 16 ປີ ຊີງແຊ໋ມເອເຊຍ (ເອເອັຟຊີ) 2016 ຮອບຄັດເລືອກ ທີ່ ສປປລາວ ເປັນເຈົ້າພາບ ລະຫວ່າງວັນທີ 2-20 ຕຸລາ ຈະເຖິງນີ້.
ອີງຕາມຂໍ້ມູນຈາກເວັບໄຊສະຫະພັນບານເຕະເອເຊຍ (ເອເອັຟຊີ) ລະບຸວ່າ : ການແຂ່ງຂັນເຕະບານ ເຍົາວະຊົນຮຸ່ນອາຍຸບໍ່ເກີນ16 ປີ ຊີງແຊ໋ມເອເຊຍ 2016 ຮອບຄັດເລືອກ ໄດ້ມີການຈັບສະຫຼາກແບ່ງກຸ່ມເປັນທີ່ຮຽບຮ້ອຍແລ້ວໂດຍມີທີມເຂົ້າຮ່ວມທັງໝົດ 45 ທີມ ແບ່ງອອກເປັນ 11 ກຸ່ມ ເຊິ່ງທີມຊາດລາວຈະໄດ້ຮັບກຽດເປັນເຈົ້າພາບ ຈັດການແຂ່ງຂັນຮອບຄັດເລືອກກຸ່ມ ຈີ ລະຫວ່າງວັນທີ2 – 20 ຕຸລາ 2015 ທີ່ປະກອບມີ ລາວ “ເຈົ້າພາບ”, ຮ່ວມກັບ ທີມຊາດມາເລເຊຍ, ຟີລິບປິນ,ນອດເທີນ ມາເຣຍນາ ແລະ ທີມຊາດຕີມໍ ເລສເຕ.
ສຳລັບ ຕາຕະລາງແຂ່ງຂັນຂອງທີມຊາດລາວ ນັດທຳອິດໃນວັນທີ 12 ຕຸລາ 2015 ເວລາ 19:00 ໂມງ ພົບກັບ ທີມຊາດຟີລິບປິນ, ນັດທີ 2 ໃນວັນທີ14 ຕຸລາ 2015 ເວລາ 19:00 ໂມງ ພົບກັບ ທີມຊາດ ມາເຣນນາ, ນັດທີ 3 ໃນວັນທີ 18 ຕຸລາ2015 ເວລາ 19:00 ໂມງ ພົບກັບ ທີມຕີມໍ ເລສເຕ ແລະ ນັດສຸດທ້າຍ ໃນວັນທີ20 ຕຸລາ 2015 ເວລາ 19:00 ໂມງ ພົບກັບ ທີມຊາດມາເລເຊຍ. ສ່ວນສະໜາມແຂ່ງຂັນຍັງບໍ່ທັນລະບຸໄວ້ຢ່າງຊັດເຈນວ່າຈະໃຊ້ສະໜາມໃດໃນນະຄອນຫຼວງວຽງຈັນຂອງ ສປປ ລາວ.
ສ່ວນ ຜົນງານຫຼ້າສຸດຂອງທີມຊາດລາວຮຸ່ນອາຍຸບໍ່ເກີນ 16 ປີ ໃນປີ 2013 ທີ່ສປປ ລາວ ເປັນເຈົ້າພາບ ແມ່ນຕົກຮອບແບ່ງກຸ່ມ ເຮັສ ຈົບອັນດັບ 3 ຫຼັງຈາກທີ່ສາມາດສະເໝີມາເລເຊຍ 1-1 ປະຕູ, ຊະນະ ເກາະກວມ 9-0 ປະຕູ, ຊະນະ ບຣູໄນ 3-0 ແລະ ເສຍ ສເກົາຫຼີ 4-1 ປະຕູ.
