ສະຖານີວິທະຍຸ ຊາວໜຸ່ມລາວ ສິນໄຊຍຸກໃໝ່ ໄດ້ເລີ່ມການກໍ່ສ້າງ ມາແຕ່ວັນທີ 7 ເມສາ 2015 ແລະ ໄດ້ສຳເລັດການກໍ່ສ້າງ ພ້ອມອອກອາກາດຢ່າງເປັນທາງການແລ້ວ ໃນວັນທີ 17 ກໍລະກົດ 2015 ນີ້, ໂດຍມີພິທີເປີດສະ ຖານີວິທະຍຸດັ່ງກ່າວຢ່າງເປັນທາງການ ໂດຍມີທ່ານ ດຣ ວິໄລວົງ ບຸດດາຄຳ ເລຂາຄະນະບໍລິຫານງານສູນກາງ ຊາວໜຸ່ມປະຊາຊົນປະຕິວັດລາວ, ພ້ອມດ້ວຍພະນັກງານ ແລະ ພາກ່າວນກ່ຽວຂ້ອງເຂົ້າຮ່ວມ. ສະຖານີວິທະຍຸຊາວໜຸ່ມລາວ ສິນໄຊຍຸກໃໝ່ ປະກອບມີຫ້ອງຈັດລາຍການສົດ, ຫ້ອງອັດລາຍການ, ຫ້ອງບໍລິຫານ ແລະ ການກໍ່ສ້າງຕາຂ່າຍສົ່ງສັນຍານ ໃນລະບົບ FM 90.0 Mhz, ເສົາອັງແຕນ ສົ່ງສັນຍານ ມີຄວາມສູງລວມ 50 ແມັດ.
ສະຖານີດັ່ງກ່າວມີທີ່ຕັ້ງຢູ່ສຳນັກງານສູນກາງ ຊາວໜຸ່ມປະຊາຊົນປະຕິວັດລາວ, ບ້ານໂພນທັນ, ເມືອງໄຊເສດຖາ ນະຄອນຫລວງວຽງຈັນ ໃນປັດຈຸບັນມີລາຍການທີ່ອອກອາກາດ ໃນສະຖານີດັ່ງກ່າວ 16 ລາຍການ ເຊິ່ງແຕ່ລະລາຍການໄດ້ນຳສະເໜີ ກ່ຽວກັບການເຄື່ອນໄຫວຂອງຄະນະ ບໍລິຫານງານສູນກາງຊາວໜຸ່ມ, ການຈັດກິດຈະກຳຕ່າງໆ ຂອງອົງການຈັດຕັ້ງຊາວໜຸ່ມ ລວມເຖິງການປະກອບສ່ວນຂອງຊາວໜຸ່ມລາວ ໃນຂະບວນການຕ່າງໆ. ສະຖານີວິທະຍຸກະຈາຍສຽງຊາວໜຸ່ມລາວ ສິນໄຊຍຸກໃໝ່ຈະເປັນເສນາທິການ ໃຫ້ແກ່ຄະນະພັກ, ຄະນະເລຂາທິການສູນກາງ ຊາວໜຸ່ມປະຊາຊົນປະຕິວັດລາວ, ເປັນບ່ອນສຶກສາອົບຮົມການເມືອງແນວຄິດ, ເປັນບ່ອນປຸກລະດົມຊຸກຍູ້ຂະບວນການຊາວໜຸ່ມ – ເຍົາວະຊົນ, ເປັນບ່ອນສະໜອງຂໍ້ມູນຂ່າວສານ, ສາລະໜ້າຮູ້, ສາລະບັນເທີງ ທັງເປັນເວທີສົ່ງເສີມຄວາມຮູ້, ຄວາມສາມາດ, ຫົວຄິດປະດິດສ້າງ ແລະ ພອນສະຫວັນ ຂອງຊາວໜຸ່ມ-ເຍົາວະຊົນລາວ ບັນດາເຜົ່າ.
ຂປລ
