ຂປລ. ນາງ ມີນາ ອ່ອນສີພັນລາ ໝາຍເລກ M 8 ອາຍຸ 21 ປີ ຕົວແທນຈາກເມືອງ ສີໂຄດຕະບອງ, ສາມາດຕອບຄຳຖາມ ໄດ້ຖືກໃຈຜູ້ຊົມ ແລະ ຄະນະກຳມະການ ຈຶ່ງຄວ້າມຸງກຸດ ນາງສາວງາມ ນະຄອນຫລວງວຽງຈັນ ປະຈໍາປີ 2015 ພ້ອມກັບລາງວັນຂວັນໃຈ ມະຫາຊົນ ແລະ ກຽມເຂົ້າຮ່ວມ ຂະບວນແຫ່ພະພຸດທະຮູບ ໃນວັນສັງຂານລ່ວງ ວັນທີ 14 ເມສາ 2015 ນີ້.
ງານປະກວດນາງສາວງາມ ນະຄອນຫລວງວຽງຈັນ ເພື່ອເຂົ້າຮ່ວມກິດຈະກຳ ສະຫລອງບຸນປີໃໝ່ລາວ ພສ 2558 ຮອບຊິງຊະນະເລີດ ໄດ້ຈັດຂຶ້ນໃນຕອນຄໍ່າ ວັນທີ 10 ເມສາ 2015 ທີ່ ສູນການຄ້າລາວ-ໄອເຕັກ ນະຄອນຫລວງວຽງຈັນ ໂດຍໃຫ້ກຽດເຂົ້າຮ່ວມໂດຍ ທ່ານນາງ ດຣ ສາຍໃຈ ໄຊຍະສອນ ພັນລະຍາ ປະທານປະເທດ ແຫ່ງ ສປປ ລາວ, ທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫລວງວຽງຈັນ ພ້ອມດ້ວຍມວນຊົນ ຊາວນະຄອນຫລວງວຽງຈັນເຂົ້າຮ່ວມ ໂດຍມີການຖ່າຍທອດສົດ ຜ່ານທາງໂທລະພາບຊ່ອງ ເອັມວີ ລາວ ເຊິ່ງການແຂ່ງຂັນ ບັນດາສາວງາມ 20 ນາງຈາກ 108 ນາງໃນ 9 ເມືອງ ຂອງນະຄອນຫລວງວຽງຈັນ ທີ່ຜ່ານເຂົ້າຮອບຊິງຊະນະເລີດນີ້ ຕ່າງກໍອອກມາອວດຮູບໂສມ, ກິລາມາລະຍາດ ດ້ວຍຊຸດແພໄໝລາວປະຍຸກ, ຊຸດແພໄໝລາຕີ ສ້າງຄວາມປະທັບໃຈ ໃຫ້ມວນຊົນທີ່ເຂົ້າຮ່ວມຊົມ.
ຜ່ານການຕອບຄຳຖາມ ຮອບສຸດທ້າຍທີ່ມີ 7 ສາວງາມ ປະກົດວ່າ ນາງ ມີນາ ອ່ອນສີພັນລາ ບ້ານ ວັດໄຕໃຫຍ່ທ່າ ເມືອງ ສີໂຄດຕະບອງ ໄດ້ຊະນະເລີດ ຮັບເງິນລາງວັນ 15 ລ້ານກີບ ແລະ ມຸງກຸດມູນຄ່າ 25 ລ້ານກີບ ພ້ອມສາຍສະພາຍ, ຮອງອັນດັບ 1 ແມ່ນ ນາງ ວິໄລສັກ ອຸ່ນນະລາດ M5 ບ້ານ ໂພນປາເປົ້າ ເມືອງສີສັດຕະນາກ ໄດ້ຮັບເງິນລາງວັນ 8 ລ້ານກີບ ພ້ອມສາຍສະພາຍ, ຮອງອັນດັບ2 ນາງ ເນດນິດາ ພິລາເກດ M18 ບ້ານ ທົ່ງປົ່ງ ເມືອງສີໂຄດຕະບອງ ໄດ້ຮັບເງິນລາງວັນ 5 ລ້ານກີບ ພ້ອມສາຍສະພາຍ, ສ່ວນຮອງອັນດັບ3 ມີ 4 ນາງຄື: ນາງ ພັນນິພາ ສີພັນດອນ M1, ນາງ ຕາດໍາ ເຮືອງຄໍາດີ M3, ນາງ ສຸກສະຫວັນ ຫລວງລາດ M10ແລະ ນາງ ພູນຊັບ ພົນໂຍທາ M12 ໄດ້ຮັບເງິນລາງວັນ ຜູ້ລະ 3 ລ້ານກີບ ພ້ອມສາຍສະພາຍ ເຊິ່ງທັງ 7 ນາງແມ່ນຈະໄດ້ເຂົ້າຮ່ວມ ກິດຈະກຳຕ່າງໆ ໃນບຸນປີໃໝ່ ລາວ ພສ 2558 ທີ່ນະຄອນຫລວງວຽງຈັນ .
ນອກນີ້ ຍັງມີລາງວັນຂວັນໃຈມະຫາຊົນ ໄດ້ແກ່ ນາງ ມີນາ ອ່ອນສີພັນລາ M 8, ຂວັນໃຈຊ່າງພາບ ນາງ ເນດນິດາ ພິລາເກດ M18, ຂວັນໃຈມິດຕະພາບ ນາງ ຕາດໍາ ເຮືອງຄໍາດີ M3 ໄດ້ຮັບເງິນລາງວັນໆລະ 2 ລ້ານກີບ./.
