ຮ້ານວາງສະແດງ-ຂາຍເຄື່ອງຫັດຖະກໍາວັນມີນາ ເປັນໜຶ່ງຮ້ານຫັດຖະກໍາ ສິນຄ້າໜຶ່ງເມືອງ ໜຶ່ງຜະລິດຕະພັນຂອງລາວ ຂອງເມືອງຫາດຊາຍຟອງ ນະຄອນຫຼວງວຽງຈັນ.ທີ່ໄດ້ວາງສະແດງ-ຂາຍຢູ່ໃນງານບຸນນະມັດສະການພະທາດຫຼວງວຽງຈັນ ປະຈໍາປີ 2025 ນີ້ ຊຶ່ງເຫັນວ່າໃນແຕ່ລະປີ ໄດ້ຮັບຄວາມສົນໃຈຈາກມວນຊົນມາທ່ຽວງານບຸນເປັນຢ່າງດີ.
ທ່ານ ນາງ ວັນມີນາ ຄັນທະວົງ ເຈົ້າຂອງຮ້ານຫັດຖະກໍາວັນມີນາ ເມືອງຫາດຊາຍຟອງ ນະຄອນຫຼວງວຽງຈັນ ໄດ້ໃຫ້ສໍາດພາດວ່າ: ຕົນເອງຮູ້ສຶກດີໃຈ ແລະ ພາກພູມໃຈທີ່ໄດ້ມີໂອກາດນໍາເອົາສິນຄ້າຫັດຖະກໍາລາວມາວາງສະແດງ-ຂາຍໃນງານບຸນແຫ່ງນີ້, ປີນີ້ ແມ່ນເລີ່ມນໍາມາວາງສະແດງ-ຂາຍແຕ່ວັນທີ 1 ພະຈິກ 2025. ສິນຄ້າທີ່ນໍາມາສະແດງ-ຂາຍປະກອບມີ: ຂັນເງິນ, ຂັນທອງເຫຼືອງ, ຊຸດໝາກ, ຊຸດພູ, ຂັນນໍ້າຢາດ, ຕິບເຂົ້າ. ໃນນັ້ນ,ຍັງມີເຄື່ອງປະດັບຕ່າງໆ ເຊັ່ນ: ສາຍແອວເງິນ, ສາຍແອວຫລຽນອາເມລິກາ, ສາຍແອວທອງນາກປະສົມ, ສາຍແຂນ, ສາຍຄໍ, ຕຸມຫູເງິນ ແລະ ອື່ນໆ. ຂາຍໃນລາຄາບໍ່ແພງ ເລີ່ມຕົ້ນພຽງ 170,000 ກີບ. ຈຸດພິເສດຂອງຮ້ານຫັດຖະກໍາວັນມີນາ ຈະເນັ້ນລວດລາຍທີ່ເປັນເອກະລັກວັດທະນະທໍາລາວ, ລາຍບູຮານຕ່າງໆ ທີ່ສວຍສົດງົດງາມ ແລະ ປານີດທີ່ສຸດ. ເຫັນໄດ້ວ່າ ຜູ້ມາທ່ຽວໃນງານບຸນໃຫ້ຄວາມສົນໃຈເປັນຢ່າງດີ ບາງຄົນກໍຊື້ໄປໃຊ້, ໄປເປັນຂອງທີ່ລະນຶກຂອງຝາກຂອງຕ້ອນ ແລະ ອື່ນໆ.
ສະນັ້ນ, ທ່ານໃດທີ່ມີຄວາມສົນໃຈສິນຄ້າຫັດຖະກໍາລາວ ສາມາດເຂົ້າມາແວ່ເບິ່ງທີ່ຮ້ານເພິ່ນໄດ້ຢູ່ເຂດຫ້ອງຂາຍ C. ພິເສດໄລຍະວາງຂາຍຢູ່ງານບຸນປີນີ້, ເພິ່ນມີການຂາຍຫຼຸດລາຄາຈາກປົກກະຕິ 30% ຂອງສິນຄ້າ.
ທ່ານ ນາງ ວັນມີນາ ຄັນທະວົງ ຍັງໃຫ້ຮູ້ຕື່ມວ່າ: ຕົນເອງໄດ້ເລີ່ມຂາຍເຄື່ອງຫັດຖະກໍາເປັນເວລາ 7 ປີແລ້ວ ແລະ ໄດ້ຮັບການຢັ້ງຢືນເປັນສິນຄ້າໂອດັອບ 5 ປີແລ້ວ, ຜ່ານມາຂາຍເຄື່ອງປະດັບພຽງເລັກໜ້ອຍ ເມື່ອເຫັນວ່າເຄື່ອງຫັດຖະກໍາລາວກໍນັບມື້ໃຫ້ການຕ້ອນຮັບ, ມີຄວາມສົນໃຈຈາກຄົນລາວ ແລະ ຊາວຕ່າງປະເທດ ຫຼາຍຂຶ້ນ ຈຶ່ງໄດ້ຂະຫຍາຍຮ້ານອອກໃຫ້ໃຫຍ່ກວ່າເກົ່າ ແລະ ໄດ້ເພີ່ມສິນຄ້າຫັດຖະກໍາໃຫ້ມີຄວາມຫຼາກຫຼາຍຂຶ້ນ. ປັດຈຸບັນມີຊ່າງຫັດຖະກໍາໂດຍແມ່ນອ້າຍເອື້ອຍນ້ອງທັງໝົດ 7 ຄົນ. ໃນປີຕໍ່ໆໄປ ກໍຈະນໍາເອົາສິນຄ້າຫັດຖະກໍາມາວາງສະແດງ-ຂາຍຢູ່ໃນງານບຸນແຫ່ງນີ້.
ທີ່ມາ: ໜສພ ປະຊາຊົນ
