ໜັງສືພິມວຽງຈັນໃໝ່ ໄດ້ແຈ້ງໃຫ້ຮູ້ວ່າ ວັນທີ 25 ມິຖຸນາ 2015 ທີ່ພິພິທະພັນຫໍພະແກ້ວ ທ່ານ ບຸນສະໜອງ ສີຫາລາດ ຫົວໜ້າກົມວິຈິດສິນ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ທັງເປັນຫົວໜ້າໜ່ວຍງານເຕັກນິກ ໂຄງການປະຕິສັງຂອນພິພິທະພັນຫໍພະແກ້ວ ໄດ້ອອກມາຊີ້ແຈງເຖິງຄວາມຈຳເປັນໃນການປະຕິສັງຂອນວ່າ: ພາຍຫຼັງໄດ້ຖືກແຕ່ງຕັ້ງຈາກຂັ້ນເທິງ ທາງໜ່ວຍງານເຕັກນິກປະກອບມີ 5 ພາກສ່ວນຄື: ວິຊາການຈາກກົມມໍລະດົກ ກົມວິຈິດສິນ ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ພະແນກໂຍທາທິການ ແລະ ຂົນສົ່ງ ນວ ແລະ ວິຊາການຈາກຫໍພະແກ້ວ ກໍ່ໄດ້ຂຶ້ນສຳຫຼວດໂຄງການຫໍພະແກ້ວ ພາຍຫຼັງສຳຫຼວດເຫັນວ່າ ໂຄງສ້າງຫຼັງຄາດ້ານເທິງແມ່ນພົບເຫັນໄມ້ບາງອັນ ຕ້ອງມີຄວາມຈຳເປັນຕ້ອງປ່ຽນຖ່າຍ ເພາະມີອາຍຸການໃຊ້ງານມາ 70-80 ປີ ພ້ອມນັ້ນ ກໍ່ໄດ້ສຳຫຼວດອາຄານເຫັນວ່າ ມີບາງຈຸດຕ້ອງໄດ້ປະຕິສັງຂອນຄືນໃໝ່ ເປັນຕົ້ນ ແມ່ຂີ້ໄຟໂຕແອວນີ້ ດອກດວງລວດລາຍບາງຈຳນວນໜຶ່ງໄດ້ຂຸອອກ ສຳລັບພື້ນແມ່ນມີການຊຳລຸດຊຸດໂຊມ ເພາະພື້ນແມ່ນເຮັດດ້ວຍດິນເຜົາ ແລະ ມີບາງບ່ອນແຕກ ໂດຍຈະໄດ້ແກະບ່ອນທີ່ແຕກອອກແລ້ວ ນຳມາໃສ່ຄືນໃໝ່ ພ້ອມນັ້ນ ດ້ານຍອດຊໍ່ຟ້າແມ່ນມີຄວາມຊຳລຸດຫຼາຍສົມຄວນຄື: ເສກກະສັດ ແມ່ນມີອາຍຸການໃຊ້ງານເຖິງ 70 ຫາ 80 ປີ ແລະ ເສກກະສັດອີກຍອດໜຶ່ງ ແມ່ນຖືກຟ້າຜ່າເກີດຊຳລຸດເສຍຫາຍ ແລະ ພາຍຫຼັງທີ່ໄດ້ສຳຫຼວດຕົວຈິງ ທາງໜ່ວຍງານເຕັກນິກ ກໍ່ໄດ້ປຶກສາຫາລືກັນ ແລະ ເປີດກອງປະຊຸມຕົກລົງເປັນເອກະພາບກັນວ່າ ມີຄວາມຈຳເປັນແທ້ທີ່ຕ້ອງໄດ້ປະຕິສັງຂອນຄືນໃໝ່ ເພາະໂຄງການປະຕິສັງຂອນຫໍພະແກ້ວໄລຍະທີ II ປີ 1936 ເຊິ່ງແມ່ນສະເດັດເຈົ້າເພັດສະລາດ ເປັນຜູ້ນຳພາໃນການປະຕິສັງຂອນ ເຫັນວ່າວັດຖະດຸການນຳໃຊ້ເປັນເຄິ່ງທຳມະຊາດ ນຳໃຊ້ຊີມັງປະສົມປູນຂາວໃນການຜະລິດຍອດຊໍ່ຟ້າ ແລະ ບ່ອນອື່ນອີກ ເຫັນວ່າຄຸນະພາບບໍ່ໄດ້ມາດຖານເທົ່າທີ່ຄວນ ນອກຈາກຍອດຊໍ່ຟ້າແລ້ວ ນັກວິຊາການກໍ່ໄດ້ເນັ້ນໜັກໃນການສຳຫຼວດໂງ່ ຢູ່ເທິງຫຼັງຄາຫໍພະແກ້ວ ເຊິ່ງມີທັງໝົດ 6 ໂຕ ເຊິ່ງເຫັນວ່າແຕ່ລະໂຕແມ່ນແຕກແຫງ ເຮັດໃຫ້ເວລາຝົນຕົກນ້ຳຊືມເຂົ້າໄປແຕະຕ້ອງໂຄງສ້າງຫຼັງຄາ ກໍ່ຄືໄມ້ເອີກໄກ່ ໄມ້ສີຍົ່ວ ໄມ້ກອນ ໄມ້ແຈ ເວົ້າລວມແມ່ນໄປກະທົບຕໍ່ໂຄງສ້າງຂອງຫຼັງຄາ ສາເຫດທີ່ເຮັດໃຫ້ໄມ້ທີ່ກ່າວມາຊຸດໂຊມນັ້ນ ຍ້ອນໂຄງຫຼັງຄາມຸງດ້ວຍດິນຂໍ ເວລາຝົນຕົກເຮັດໃຫ້ດິນຂໍເກີດຄວາມຊຸ່ມສົ່ງຜົນກະທົບຕໍ່ໄມ້ກອນ ແລະ ໄມ້ແກເຮັດໃຫ້ມີອາຍຸການໃຊ້ງານຫຼຸດລົງ ຈຶ່ງຈຳເປັນຕ້ອງປ່ຽນຖ່າຍ 100% ການປະຕິສັງຂອນແມ່ນອິງໃສ່ຮູບຊົງເກົ່າ ແລະ ລວດລາຍເກົ່າ ໂດຍສະເພາະ ຈະໄດ້ນຳໃຊ້ລະບົບແບບກ໋ອບປີ້ດ້ວຍສິລິໂຄນ ເວົ້າລວມແມ່ນຈະປະຕິສັງຂອນ ອອກມາໃຫ້ຄ້າຍຄືຮູບແບບເກົ່າທີ່ສຸດ ເພື່ອຮັກສາເອກະລັກທາງດ້ານວັດທະນະທຳ ແລະ ປະຫວັດສາດ ເພາະຫໍພະແກ້ວເປັນສູນລວມທາງດ້ານວັດທະນະທຳ ແລະ ປະຫວັດສາດອັນລ້ຳຄ່າ ເພື່ອໃຫ້ບັນດາອະນຸຊົນ ເຍົາວະຊົນມາຮຽນຮູ້ປະຫວັດຄວາມເປັນມາ ທາງດ້ານປະຫວັດສາດຂອງຊາດ.
