ວັນທີ 19 ກໍລະກົດ 2025 ນີ້, ທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປລາວ ພົບປະໂອ້ລົມ ຄະນະບໍລິຫານງານພັກ ແຂວງອຸດົມໄຊ ໂດຍໄດ້ຮັບການຕ້ອນຮັບຂອງ ທ່ານ ບຸນຄົງ ຫຼ້າຈຽມພອນ ກຳມະການສໍາຮອງສູນກາງພັກ ເລຂາຄະນະບໍລິຫານງານພັກແຂວງ ແລະ ໄດ້ພົບປະເຮັດວຽກຮ່ວມກັບການນໍາຂອງແຂວງ ຢູ່ຫ້ອງປະຊຸມຫ້ອງວ່າການແຂວງ.
ທ່ານ ບຸນຄົງ ຫຼ້າຈຽມພອນ ເຈົ້າແຂວງອຸດົມໄຊ, ໄດ້ລາຍງານວ່າ: ການກະກຽມສ້າງຕັ້ງຕາແສງ ອົງການປົກ ຄອງແຂວງອຸດົມໄຊ ໄດ້ຄົ້ນຄວ້າຄາດຄະເນສ້າງຕັ້ງກົງຈັກການຈັດຕັ້ງຂັ້ນຕາແສງ ມີ 40 ຕາແສງ ( ປັດຈຸບັນທົ່ວແຂວງ ມີ 7 ເມືອງ, 466 ບ້ານ) ໃນນີ້, ຄາດຄະເນຈະສ້າງຕັ້ງຕາແສງຢູ່ບັນດາເມືອງ ຄື: ເມືອງໄຊ: ມີ 97 ບ້ານ, ກໍານົດເປັນ 8 ຕາແສງ; ເມືອງຫຼາ: ມີ 45 ບ້ານ, ກໍານົດເປັນ 5 ຕາແສງ; ເມືອງນາໝໍ້: ມີ 63 ບ້ານ, ກໍານົດເປັນ 5 ຕາແສງ; ເມືອງງາ: ມີ 60 ບ້ານ, ກໍານົດເປັນ 5 ຕາແສງ; ເມືອງແບງ: ມີ 56 ບ້ານ, ກໍານົດເປັນ 5 ຕາແສງ; ເມືອງຮຸນ: ມີ 92 ບ້ານ, ກໍານົດເປັນ 7 ຕາແສງ; ເມືອງປາກແບງ: ມີ 53 ບ້ານ, ກໍານົດເປັນ 5 ຕາແສງ.
ທີ່ມາ: ສະຖານີວິທະຍຸ-ໂທລະພາບ ແຂວງອຸດົມໄຊ
